CEBU CITY-Magtingkagol sa prisohan ang usa ka 58-anyos nga buko vendor sa dakbayan sa Sugbo ug laing duha ka tawo human sila nadakpan sa gibanabanang P88,400 nga kantidad sa gituohang shabu atol sa buy-bust operation Biyernes Septiyembre 22, 2023.
Matod sa Philippine Drug Enforcement Agency sa Central Visayas (PDEA-7), ang operasyon niresulta sa pagkasikop sa tulo ka tawo ug pagpasira sa usa ka gidudahang drug den sa siyudad.
Nasikop atol sa operasyon ang 58-anyos nga si Rene Francisco Falla nga naila usab sa pangalang “Tatay,” kinsa nagtrabaho isip buko vendor.
Matod sa PDEA-7 nga si Falla usa ka gidudahang drug den maintainer ug subject sa buy-bust operation.
Nasikop usab sa mga otoridad ang laing duha ka tawo nga gidudahang mga bisita sa drug den.
Giila ang giingong mga bisita nga sila si Joseph Silinduran, 18 anyos ug Benjamin Jamito Jr, 20 anyos.
Ang tulo ka mga dinakpan pulos residente sa maong barangay.
Nakuha sa mga otoridad gikan sa mga suspetsado ang unom ka pakete sa gituohang shabu nga motimbang og 13 gramos. Ang nakumpiska nga giingong illegal nga drugas adunay gibanabanang market value nga P88,400.
Nasakmit usab sa mga operatiba atol sa operasyon ang nagkadaiyang drug paraphernalia gikan sa dapit.
Matod sa PDEA-7 ang mga ebidensiya sa drugas gisumite na sa laboratoryo alang sa chemical analysis ug saktong disposisyon.
