CEBU CITY-Dako ang pagtoo sa Philippine Accessible Disability Services Inc. (PADS) Dragon Boat Racing Team nga nagbasi sa Cebu ug puro mga Cebuano nga nakuha nila ang respeto sa Dragon Boat Community.
Kini ang gibutyag ni JP Maunes ang CEO Founder ug team manager sa PADS human nga nalangkat niini ang 4 ka gold medal atol sa 14th International Dragon Boat Federation (IDBF) World Nations Championships sa Pattaya, Thailand.
Matud ni Maunes sa dihang na-hinabi live sa Thailand atol sa Zona Libre Sunday Edition program nga natuman gyud ang ilang gipangandoy nga makasalmot sa pinakadako nga dragon boat race kung diin 30 ka nasud ang misalmot niini.
Mapasigarbohon usab si Maunes sa nakuha nila nga atensyon kung diin pipila sa mga misalmot nga taga laing nasud ang wala nagtoo nga mapildi kini sa PADS nga ang paddlers sagol mga PWD.
Nasayran nga kapin na sa 20 ka mga race ang ilang nasalmotan sulod sa 3 ka tuig ug dili na matud pa kini bago para kanila apan lahi ra gyud matud pa ang international nga competition.Usa gyud kini nga garbo nga gusto nila dad-on sa Sugbo ug sa Pilipinas.
Kapin 20 kabook ang mga paddlers sa PADS kung diin naila na usab kini sila tibook nasud tungod sa ilang talagsaon nga dragonboat racing team.
Mabalik sa Subo ang PADS karong petsa 28 ug lauman nga makiselebrar kini sa Sugbuanon sa kadaugan ug garbo nga ilang dala.
Una na usab nga nalangkat sa PADS ang kampyonato sa dragon race sa Hongkong ug sunod musalmot na usab sila sa dragonboat race sa nasud nga France.
