CEBU CITY-Nakalangkat og 6 ka gold medals, 5 ka silver ug 11 ka bronze medals ang pito ka Oponganons sa 16th World Dragon Boat racing Championships nga gipahigayon sa Thailand niadtong Agosto 7 hangtud 13.
Gikan sa lain-aing barangays sa Lapulapu ang pito ka mga membro sa Philippine Accessible Disability Service (PADS) Paradragon Elite team naglakip nila ni Myran Puso, Princess Dag-om, John Tiu, Eduardo Pangatungan, Timmy Dinopol, Ramoncito Noguera, ug Rocky Berdin.
Gipresentar sa team ang ilahang medalya ngadto ni Mayor Junard ”Ahong” Chan sa city hall gahapong adlawa nga Martes, Agosto 22.
Nihangyo ang Mayor ngadto sa konseho nga mopasar og resolution nga magpasidungog sa pito ka Oponganons nga nakahatag og dungog sa siyudad.
Nakigsangka ang Oponganons apil na ang 22 ka membro sa dragon boat team sa nasud ngadto sa laing 80 ka mga nasud sa tibuok kalibutan.
