CEBU CITY-Gipahibalu ni Cebu City Police Office Director Police Colonel Gemma Vinluan nga nakakuha na sila ug inisyal nga pamahayag gikan ni Atty Inocencio Dela Cerna kalabut sa mga posibling nagpaluyu sa pag-ambush sa manlalaban niadtong adlaw Lunes, Setyembre 2.
Apan gitataw ni Vinluan nga dili na una nila mapahibalu karun sa publiko arun nga dili maguba ang ilahang imbestigasyon.
Matud pa nga nag-unang motibo sa maong ambush nga ilahang gilantaw mao ang trabaho ni Atty Dela Cerna kung diin aduna kini daghang mga bug-at ug kontrobersyal nga kaso nga gihuptan.
Gibutyag usab ni Col. Vinluan nga aduna sila’y mga CCTV footage nga nakuha apan giingung dili man klaru hayan naglisud pa sila sa pagkakarun.
Giangkun sa police director nga daku unta ug ikatabang ang CCTV sa pagsulbad sa kaso apan adunay wala mag-function ug adunay nag-function apan dili usab klaru ang kuha.
Sa pagkakarun, nagbutang na ang CCPO ug dugang personnel sa palibut sa Cebu City Hall of Justice, ingun man nga aduna na usa’y nag-patrolya sa area.
Mihangyu usab si Vinluan sa mga abogado ug ni bisan kinsa nga adunay hulga sa kinabuhi nga magpahibalu sa kapulisan arun nga mapakgang ug dili na makahigayun pa ug himu sa dautang plano ang mga assailant. (SBR)
