Mas pahugtan pa ug nakabase sa competency ang pag-hire sa mga empleyado sa kagamhanan human ang Civil Service Commission (CSC) nagpagawas og bag-ong mga guidelines.
Tumong niini mao ang pagtapos sa traditional nga paper-based system sa recruitment ug pag-ilis niini sa usa ka proseso nga gibase sa aktuwal nga mga abilidad sa mga aplikante.
Ubos sa CSC Resolution No. 2600005, ang tanang ahensya sa gobyerno gimandoan sa pagpatuman sa Competency-Based Human Resource Management Systems (CBHRMS).
Imbis nga mag-focus lamang sa mga dokumento ug pagsunod, kini nga sistema gamiton aron masiguro nga ang mga nag-okupar sa mga posisyon adunay husto nga kahanas aron mapauswag ang serbisyo publiko.
Sumala sa CSC, ang mga ahensya gikinahanglan nga moila sa tulo ka nag-unang aspeto sa pag-hire: core competence sama sa pagka-citizen-centered, kahanas, ug integridad; mga leadership competencies alang sa mga manager ug supervisor; ug mga technical competencies nga gibase sa trabaho mismo.
Gimandoan usab ang mga buhatan sa pag-update sa ilang mga polisiya sa human resource, lakip ang Merit Selection Plan, Strategic Performance Management System, ug ang Program on Awards and Incentives for Service Excellence.
Ang maong resolusyon mahimong epektibo sulod sa 15 ka adlaw human kini mapatik sa usa ka mantalaan nga kaylap ang sirkulasyon o sa Official Gazette.
