CEBU CITY — Gitataw ni Cebu City Legal Officer Atty. Regal Gealon nga kinahanglang sundon ang mga guidelines nga gihan-ay sa Interagency Task Force on Emerging Infectious Disease (IATF) taliwa sa nagkasaka nga kaso sa COVID-19.
Kini human nga nakadawat ang city government og mga reklamo kalabot na sa mga isolation protocols alang sa mga COVID-19 patients.
Nasayran nga pipila sa mga pasyente, ilabi na gikan sa Brgy. Mambaling, ang nagdumili nga ibalhin sa Barangay Isolation Centers.
Matud sa tigpamaba ni Mayor Edgardo Labella nga si Gealon nga base sa IATF guidelines, kinahanglang ipaubos sa home quarantine ang pasyente kung haum ang panimalay alang niini.
Kung dili man haum, ibalhin ang maong pasyente ngadto sa gitagana nga isolation center aron magpaalim.
Samtang ipahimutang sa mga gi-andam nga quarantine facilities sa dakbayan sa Sugbo ang mga nagpositibo sa COVID-19 nga adunay sintomas.
Kinahanglan usab nga ideretso sa tambalanan kung adunay severe symptoms sa coronavirus.
Dugang pa ni Gealon nga andam ang kagamhanan sa dakbayan kun ugaling mosaka pag-ayo ang mga natakdan sa COVID-19 inig human sa rapid mass testing.
Mipasalig ang kagamhanan nga atimanon gayud ang panginahanglanon sa mga pasyente.
Kapasidad sa mga isolation centers
Sa laing bahin, mipadayag si Councilor Joel Garganera nga anaa na kapin 2,000 ang higdaanan ang gi-andam alang sa mga asymptomatic patients kinsang magpaalim sa mga BIC.
Kini human nga nakadawat ang kagamhanan og dugang pang mga beds gikan sa mga government agencies aron mahatagan og igong kapasidad ang mga pasyente.
Mipasalig ang konsehal nga dili gayud pasagdaan sa gobyerno ang mga pasyenteng nagpositibo sa COVID-19 tungod kay andam kining mo-abag sa mga panginahanglanon.
Subay na usab sa kanunay nga pagmonitor sa mga health authorities sa mga pasyente aron subayon ang kahimtang sa panglawas.
