Gihangop ni Akbayan Party-list Representative Percy Cendaña ang desisyon sa Senate Impeachment Court nga aprobahan ang pag-isyu og subpoena alang sa bank records ug tax documents ni Vice President Sara Duterte, nga iyang gihulagway isip usa ka mahinungdanong lakang aron mapalig-on ang pagpangita sa kamatuoran sa nagpadayon nga impeachment trial.
Kini ang gipaambit ni Cendaña sa pakighinabi sa Bombo Newsteam, gani mitambong siya sa impeachment hearing aron personal nga masubay ang kalamboan sa maong proseso, ilabina kay siya ang nanguna kaniadto sa House of Representatives sa paghangyo nga ipasumite ang mga rekord gikan sa Bangko Sentral ng Pilipinas (BSP) isip kabahin sa imbestigasyon.
Bisan wala maaprobahi ang tanang hangyo sa prosecution, giingon sa kongresista nga dako gihapon kini og kahulogan alang sa kaso, ilabina ang pag-aprubar sa subpoena sa bank records nga mahimong makatabang sa pagsusi sa mga pagsulod ug paggawas sa pondo pinaagi sa mga kuwestiyonableng transaksiyon.
Dugang pa niya, pinaagi sa maong mga dokumento, masusi usab ang mga bank accounts sa nagkalain-laing institusyon sa panalapi, ingon man ang mga rekord nga may kalabotan sa mga kompanya nga gipasangil nga wala maapil sa mga deklarasyon sa Statement of Assets, Liabilities and Net Worth (SALN).
Gipasalamatan usab ni Cendaña ang Senate Impeachment Court tungod sa pagbarog niini sa hustong proseso ug sa paghatag og higayon nga mapresentar ang mga ebidensiya nga gikinahanglan sa kaso.
Matod niya, ang maong desisyon nagpakita nga ang korte nagpabiling independente sa pagdumala sa impeachment proceedings, bisan pa sa mga alegasyon sa external pressure nga gitumong sa kampo ni kanhi Presidente Rodrigo Duterte aron mapugngan ang pagsumite sa maong mga dokumento.
