CEBU CITY-Gikasubo ni Cebu City Councilor James Cuenco ang pagbalhin sa completion date sa Cebu Bus Rapid Transit (CBRT) project gikan sa tuig 2025 ngadto sa tuig 2027, kini gumikan sa pipila ka mga pagbag-o sa disenyo sa proyekto.
Nalakip niini ang Package 4, nga usa ka dedicated lane gikan sa Bulacao paingon sa Mambaling, extension sa alignment gikan sa Ayala ngadto sa IT Park, usa ka rotunda ilawom sa flyover sa Mambaling, ug ingon man ang pagbag-o sa mixed traffic lane subay sa South Road Properties (SRP) coastal road ug sa F. Vestil St.
Matod pa ni Cebu City Councilor James Cuenco, ang sa Chairman sa Committee on Transportation nga daw sama sa gipatas-an ang pag-antos sa mga publiko gumikan sa dayag nga epekto sa maong proyekto ngadto sa kahuot sa dagan sa trapiko.
Dugang sa opisyal nga bisan pa man og makumpleto ang maong proyekto, wala sa gihapoy kasiguradohan kung masolbad ang problema sa trapiko gumikan kay nagpabilin nga huot ang kadalanan ug wala kini gipalapdan, butang nga gikaguol sa opisyal.
Gibutyag usab niini nga dako ang iyahang pagsupak sa maong proyekto gumikan kay matod pa nga wala kini tul-id nga plano ug pag-implementar bisan pa sa sinugdanan.
