CEBU PROVINCE – Wala gisabotahe ug dili tinuyoan sa Alberca Sounds and Lights ang nahitabong “technical glitches” atol sa Pasigarbo sa Sugbo 2023, nga gipahigayon sa Carcar City, niadtong adlaw nga Dominggo, Agosto 28.
Sa exclusive interview sa Bombo Radyo Cebu kang Isidro Alberca, ang tag-iya sa Alberca Sounds and Lights, gipasabot niini nga gumikan sa kagamay na lang sa oras hinungdan nga nahitabo ang mao nga palpak.
Matud ni Alberca, petsa 24 sa Agosto, nahuman na nila og setup ang technical nga aspeto, apan pagka-gabii sa maong petsa, gipabalhin ang stage gumikan kay wala kini ma-sentro sa oval.
Agosto 20 pa lang nagsugod na sila og setup ug nahuman kini pagka-petsa 24.
Gawas pa niini, pagka-petsa 25 sa Agosto, giingong gipa-usab ni Cebu Provincial Governor Gwendolyn Garcia ang mga LED wall, butang nga sigon pa, dili lalim nga trabaho gumikan kay 12 ka sets ang maong mga LED wall.
Giingong mipadayag kini sa iyahang kabalaka kay pila na lang kaadlaw apan igo lang gihapon kining misunod sa mando sa production team.
Gihimug-atan ni Alberca nga temprano na gayud unta kung wala lang magbalhin-balhin sa stage.
Hinuon, giklaro niini nga nakita usab niya ang grabi nga kahago sa production team nga gipangulohan ni Margo Frasco, apan sila sa technical side ang nag-gukod na sa oras gumikan sa mga kausaban.
Kung aduna pa’y igo nga oras, dili man siento porsyento nga mahimong perpekto, apan kung aduna man gani problema, sigurado nga dali lang kini nga masulbad.
Nagkanayon si Alberca nga kung gisunod lang ang una nang nasabotan hayan wala gayud unta’y mahitabo nga problema.
Samtang, mihangyo usab kini, ngadto kang Governor Garcia, nga dili na lang kini palabi-an og duot gumikan kay naningkamot usab kini kutob sa iyahang makaya nga mahimong perpekto ang Pasigarbo sa Sugbo 2023.
Kini ang pamahayag ni Alberca subay sa mga birada sa gobernador batok kaniya.
Gibutyag niini nga wala niya gipadaplin ang gibati nga kasuko sa gobernador gumikan kay walay tawo nga dili masuko sa mga mahitabo nga technical trouble.
Apan, hangyo niini sa opisyal nga dili na lang magpalabi gumikan kay nasakitan na usab ang iyahang pamilya ilabi na ang iyahang anak nga si Jhesidy Thea Alberca kinsang midaog isip Pasigarbo sa Sugbo Festival Queen 2023.
Matud ni Alberca nga kinsa man siya arun nga isabotahe ang maong kalihokan arun lang nga modaog ang iyahang anak.
Dugang pa, iyahang anak ang nakadaog sa Kabkaban Festival 2023 sa dakbayan sa Carcar hinungdan nga mao usab kini ang gipadala alang sa Pasigarbo sa Sugbo.
Nangayo na lang og pasaylo si Alberca ngadto sa gobernador ug mi-ingon nga wala kini kontrol sa maong panghitabo, diin iyahang gihimo ang tanan arun nga walay mahimong problema ug gani sa tulo ka higayon nga nahimo kining partner sa Kapitolyo alang sa Pasigarbo, giingong karun pa gayud nahitabo nga adunay palpak sa teknikal nga bahin. | SBR
