Gipaambit sa Philippine Amusement and Gaming Corporation (PAGCOR) nga bukas kini sa sugyot nga ipahamtang ang mas estrikto nga mga regulasyon batok sa online gambling.
Diin ang balaudnon, nga gisang-at ni Senador Sherwin Gatchalian, nagduso usab sa pagdili sa paggamit sa e-wallet alang sa online gambling.
Ingon man nga mipasalig ang PAGCOR sa publiko nga, uban sa like-minded agencies ug organisasyon, kini nagpabilin nga bug-os nga pasalig sa pagpakusog sa ilang mga paningkamot batok sa pagdagsang sa mga ilegal nga kalihokan sa online gaming.
Sa press briefing sa miaging buwan, si Palace Press Officer Undersecretary Claire Castro nagkanayon nga ang Department of Information and Communications Technology (DICT) mitangtang na sa 7,000 ka dili awtorisado nga online gaming sites nga giila sa PAGCOR.
Gidugang usab niini nga ang gobyerno dili motugot sa pagkaylap sa walay lisensya nga Internet gaming platforms, nga nag-awhag sa publiko nga dili mag-promote sa mga ilegal nga website.
