Gikabalak-an sa usa ka grupo ang paglangan sa Senado sa pagpasa sa anti-online piracy bill, nga nagpasiugda nga ang kakuwang sa ligal nga panalipod alang sa intellectual property kay nagpadayon nga makadaot sa mga creative industries atubangan sa kaylap nga piracy.
Matud ni Pet Climaco, Consumer and Citizen (KM) convenor nga ang mga balaudnon kay nangaluya sa Senate Committee on Trade, Commerce and Entrepreneurship nga gipangulohan ni Sen. Alan Peter Cayetano bisan pa nga ang ilang klaro nga mga bentaha gipahimutang sa tanan nga mga stakeholder sa industriya nga nabiktima sa mga paglapas sa intelektwal nga kabtangan.
Gikwesyon niini nga aduna bay makatarunganon nga rason sa paglangan sa maong sugyot o bakaha walay interes ang senador sa liboan nga mga apektadong pamilya sa entertainment ug sa creatives industry.
Duha ka balaudnon, lakip ang Senate Bill Nos. 2150 ug 2385 ang pending sa Senado, nga parehong nagtinguha sa pag-amendar sa Intellectual Property Code of the Philippines aron matubag ang online piracy.
Apan, karon nga ang komitiba gipangulohan ni Cayetano, wala pa makalihok o kalamboan kining maong mga sugyot.
Gipasiugda ni Climaco nga ang pagpasa sa balaudnon maghatag sa awtoridad sa gahum sa pagbabag sa mga ilegal nga site, pagpugong sa dugang nga kadaot sa ekonomiya sa creative sector, nga nawad-an na og binilyon ka pesos.
