Gipahayag ni Jaime Paglinawan, usa ka inilang lider sa pundok sa mga mamumuo, nga ang nagkagamay nga trust rating ni Presidente Ferdinand “Bongbong” Marcos Jr. usa ka klarong timailhan sa nagkagrabe nga kasagmuyo sa katawhang Pilipino ngadto sa kasamtangang administrasyon.
Sa pakighinabi sa Bombo Newsteam, gipasabot ni Paglinawan nga ang maong pagkunhod sa pagsalig sa publiko dili angayan nga isalikway sa Palasyo, gumikan nagpakita kini nga wala makauyon ang kadaghanan sa paagi sa pagdumala sa nasud, ilabi na sa mga isyu nga direktang nag-apektar sa matag Pilipino.
Usa sa mga grabeng isyu nga giingong nakadugang sa kasuko sa katawhan mao ang mga isyu sa anomaliya sa flood control projects nga nakalusot sa 2025 National Budget.
Samtang nagkalisod ang katawhan tungod sa kanunay nga pagbaha ug kakuwang sa serbisyo, nanggawas hinuon ang mga kwestyonableng pundo sa gobyerno.
Gisubli usab niini nga ang pagkunhod sa rating sa Presidente kay dili nagpasabot nga nahibalik ang salig ngadto sa ikaduhang presidente, busa iyang gipahinumduman nga dili usab kalimtan ang kontrobersiya nga gikalambigitan ni VP Sara Duterte sa confidential funds nga giingong gigasto lang sulod sa 11 ka adlaw.
Subay niini, giawhag sa grupo ni Paglinawan ang gobyerno nga maminaw sa tingog sa masa imbes nga magtutok lamang sa mga statistical data.
