Nagkahiusa ang pribadong sektor ug ang Kapitolyo sa Sugbo aron sulbaron ang krisis sa enerhiya nga dala sa panagbangi sa Middle East human ang tigum nga gipangunahan sa Department of Trade and Industry (DTI) niadtong Martes, Marso 31.
Gipahibalo ni Cebu Governor Pamela Baricuatro ang panginahanglan og dinalian ug hiniusang lihok aron lig-onon ang supply ug logistics chain sa probinsya, ug gipaniguro sa gobernadora nga aktibo ang kagamhanang probinsyal sa pagpangita og mga pamaagi aron masuportahan ang publiko ug mapadayon ang kalig-on sa ekonomiya.
Gipadayag ni Cebu Chamber of Commerce and Industry (CCCI) President Regan Rex King ang suporta sa mga negosyante ug giawhag ang tanang grupo nga magkahiusa aron atubangon ang kritikal nga sitwasyon sa supply chain.
Atol sa maong tigum, girekomendar sa mga stakeholder ang pagpatuman og price control sa lana ug mga palaliton, paghatag og tax relief, hugot nga pagmonitor batok sa pagmanipula sa presyo, ug paghatag og financial assistance.
Gipahibalo usab ni Department of Labor and Employment (DOLE) Regional Director Roy Buenafe ang ₱200 milyones nga ayuda alang sa mga trabahante sa Central Visayas. Giawhag usab niya ang mga negosyo nga mogamit og flexible work arrangements aron makadaginot sa enerhiya.
Gisugyot usab ni Governor Baricuatro ang pagmugna sa programang Unified Package for Livelihoods, Industry, Food, and Technology (UPLIFT). Kini nga programa magsilbing plataporma aron magtinabangay ang mga lokal nga kagamhanan, ahensya sa gobyerno, ug ang pribadong sektor alang sa malungtarong kalamboan.
Gitambungan usab ang maong tigum ni Cebu City Mayor Nestor Archival.
