Giablihan sa Department of Social Welfare and Development sa Central Visayas (DSWD-7) ang ilang Walang Gutom Kitchen ubos sa Pag-abot Program, nga gipahigayon sa sa Pier 4, OKK Square Unit, Arellano Boulevard corner Gen. Maxilom Extension sa dakbayan sa Sugbo niadtong Lunes, Hunyo 22.
Kini ang ikaduhang Walay Gutom Kitchen sa nasud, diin ang mga labing kabus makadawat og libreng pamahaw ug paniudto.
Ang maong pasilidad gihimo aron magsilbing dapit alang sa mga walay puy-anan, mga pamilya ug bata sa kadalanan, ingon man ang mga ordinaryong tawo nga nakasinati og kagutom tungod sa kalisod sa kinabuhi.
Samtang gawas sa Presidente, nitambong usab sila si Social Welfare Secretary Rex Gatchalian, DSWD-7 Director Shalaine Lucero, Cebu Governor Pamela Baricuatro, ug Cebu City Mayor Nestor Archival, diin nakigsalo pa sila sa paniudto uban sa mga benepisyaryo.
Subay niini, gikalipay ni DSWD 7 Regional Director Lucero nga personal nga gidumala ni Presidente Marcos ang pag-abli sa Walang Gutom Kitchen sa Dakbayan sa Sugbo, kinsa giila nga ang unang feeding center sa gobyerno gawas sa Metro Manila.
Matod niya, maayo nga personal nga gipangulohan sa Presidente ang inagurasyon sa pasilidad aron mas daghang tawo ang makabenepisyo sa programa ug madasig usab ang daghang tawo nga motabang o moboluntaryo.
Nang-apod-apod ang maong Walang Gutom Kitchen og libreng init nga pagkaon alang sa gibana-bana nga 250 ka tawo matag “meal,” diin paniudto una ang giserve sa nahabilin nga mga adlaw karong bulana sa Hunyo, samtang dungan na nga i-serve ang libreng pamahaw ug paniudto kada adlaw sugod sa buwan sa Hulyo.
Abli ang pasilidad kada adlaw gikan sa alas 6:00 sa buntag hangtod sa alas 3:00 sa hapon, diin gawas sa pagkaon, modawat usab kini og mga walk-in nga nanginahanglan og tabang gikan sa uban pang mga programa sa kaayohan sa DSWD.
