Gipagawas sa Quezon City Regional Trial Court Branch 98 ang usa ka warrant of arrest batok kang Bise Presidente Sara Duterte kalabutan sa kasong “grave threats” nga gipasaka batok kaniya.
Matud pa nilang ML Party List Rep. Leila de Lima ug Lanao del Sur 1st District Rep. Zia Alonto Adiong, ang pag-isyu sa warrant nagpakita nga ang korte nakakita og “probable cause” o igong determinasyon human sa pagrepaso sa mga ebidensya nga natala.
Gipahayag ni De Lima nga kinahanglang tubagon sa Bise Presidente ang mga akusasyon diha sa criminal court, samtang gipahinumdoman sab ni Adiong nga bisan pa man sa warrant, gihuptan gihapon ni Duterte ang katungod sa “due process” ug magamit niya ang tanang legal nga remedyo.
Ang maong kaso nagagikan sa iyang pamahayag sa usa ka online briefing niadtong Nobyembre 2024 kung diin gihisgutan niya ang pagpapatay kang Presidente Ferdinand Marcos Jr., First Lady Liza Araneta-Marcos, ug House Speaker Martin Romualdez kon siya man gani ang ipatay, bisan paman gipasabot sa Bise Presidente nga “out of context” ang maong giingon.
Nanawagan usab si House Impeachment Prosecutor Terry Ridon nga ibalhin ang kaso sa korte ug ibulag sa mga proseso sa impeachment nga giatubang usab ni Duterte sa Senate Impeachment Court.
Gipasabot ni Ridon nga adunay managlahing konstitusyonal nga katungdanan ang duha ka institusyon, ug angay silang patubayon sa ilang tagsa-tagsa ka proseso nga walay pagpasiugda og sayong paghukom.
Gidugang pa niya nga gihatagan og bili sa panel ang pamahayag nga walay intensyon si Duterte nga molihay sa balaod ug adunay igong kahigayonan nga ipresenta ang iyang depensa sa korte.
Sa pikas bahin, gipadayag ni Senador Bong Go ang iyang pagpanuko bahin sa timing sa pagpagawas sa warrant of arrest, diin gihulagway niya kini nga kadudahan tungod kay natudlong nahitabo kini samtang nagpadayon ang impeachment trial.
Sumala pa ni Go, hapit na duha ka tuig ang nakalabay gikan sa maong insidente niadtong Nobyembre 2024 ug ngano daw nga karon lang kini gigawas.
Bisan pa man niini, masaligon ang senador nga kayang idumala ug atubangon ni Duterte ang maong sitwasyon.
Gidugang usab niya nga dili makaapekto ang maong pamaagi sa QC RTC sa impeachment trial sa Senado, diin nagpadayon ang paghukom sa giingong pamaagi sa paggamit sa confidential funds sa Office of the Vice President ug Department of Education.
