CEBU – Gipahibalo ni Cebu City Mayor Michael Rama nga karun sa iyahang subling paglingkod isip mayor sa dakbayan, himuon niini nga prayoridad ang pagmontar ug mga functional nga closed-circuit television (CCTV) camera sa nagkadaiyang su-ok, ingon man sa mga establisimento.
Matud ni Rama nga dako ug tabang ang mga CCTV sa pag-address sa kriminalidad sa dakbayan, hayan hatagan kini ug pagtagad sa iyahang administrasyon.
Kini human nabantayan sa mayor nga sa matag krimen nga mahitabo sa dakbayan, aduna may CCTV nga makita ang kapulisan, apan inig susi niini, giingong dili kini functional, hinungdan nga dili sa gihapon magamit sa imbestigasyon.
Samtang, tuyo usab ni Mayor Rama nga butangan ug ‘monitoring’ ang iyahang opisina susama sa command center nga anaa mahimutang sa Barangay Mambaling, arun nga kini mismo ang makakita kung adunay mga mahitabo nga krimen o disgrasya sa dakbayan.
