CEBU CITY- Gibutyag ni National Bureau of Investigation (NBI) Director Atty. Melvin Matibag nga usa sa mga angay hatagang prayoridad sa kagamhanan mao ang pagpanalipod sa sektor sa agrikultura, subay sa direktiba ni President Ferdinand Marcos Jr.
Kini ang gipahayag ni Matibag atol sa gihimong inspeksyon sa Bureau of Customs (BOC) ug NBI sa 25 ka container van nga adunay gibanabanang ₱980 milyones nga kantidad sa gidudahang ilegal nga sigarilyo nga nasakmit sa mga awtoridad sa Mandaue City, Cebu, niadtong Sabado, Hulyo 11, 2026.
Matud ni Matibag, kinahanglan panalipdan ang sektor sa agrikultura tungod kay dako ang mahimong epekto sa panginabuhian sa mga mag-uuma ug sa lokal nga industriya kon magpadayon ang smuggling.
Busa, padayon ang pakig-alayon sa NBI sa ubang law enforcement agencies aron hingpit nga mapukan ang mga ilegal nga kalihokan.
Nanawagan usab si Matibag sa mga Local Government Units (LGUs) nga motabang sa pagbantay ug pagpakigbatok sa smuggling. Gipasidan-an usab niya nga dili mohunong ang kagamhanan sa paggukod ug pagpasaka og kaso batok sa mga responsable ug nagpaluyo sa maong mga ilegal nga kalihokan.
Ang maong operasyon giila sa mga awtoridad isip usa sa labing dagkong anti-smuggling operations sa kasaysayan sa Central Visayas.
Gihimo ang inspeksyon base sa intelligence report nga nadawat sa BOC pinaagi sa pakigtambayayong sa NBI ug Philippine National Police–Criminal Investigation and Detection Group (PNP-CIDG).
Gipadayag sa BOC nga ang maong dakong sakmit kabahin sa mas gipakusog nga kampanya sa gobyerno batok sa smuggling aron mapanalipdan ang kita sa estado ug mapugngan ang ilegal nga pamatigayon sa mga produktong tabako sa nasod.
