Gisugdan na ang pagpangandam alang sa Sinulog 2026 pinaagi sa pag-file og pipila ka mga resolusyon sa Cebu City Council, nga gipangulohan ni Cebu City Councilor Dave Tumulak, sa unang adlaw sa Agosto.
Mibutyag si Tumulak nga nagpahigayon na sila og sunodsunod nga mga tigom aron sugdan ang pagpangandam sa tinuig nga kapistahan. Matod nini nga ila nang gilatid ang tagsa-tagsa ka tahas ug responsibilidad sa matag mapili nga opisyal sa dakbayan atol sa Sinulog.
Sigon usab niini nga kini nga inisyatiba naggikan sa kamandoan ni Cebu City Mayor Nestor Archival Sr., nga nag-ingon nga ang tanang konsehal sa dakbayan kinahanglang mosalmot sa kapistahan ug kinahanglang mo-contribute sumala niana.
Makigtagbo usab sila sa Sinulog executive committee aron pag-andam dili lang sa mga personnel kon dili lakip na sa logistical support alang sa Sinulog ug sa Fiesta Senior.
Lakip sa ilang giplanohan nga ipresentar ngadto sa Basilica Minore del Santo Nino para sa Fiesta Senior ang Nino Bisita sa Barangay, dungan sa pagbisita sa Cebu City Jail, usa ka inisyatiba nga gipasiugdahan ni Tumulak niadtong 2016.
Isip Chairman sa Committee on Disaster sa City Council ug sa executive counterpart niini, si Tumulak niingon nga ang Sinulog sa sunod tuig gilauman nga lahi, diin ang tumong mao ang mas inklusibo ug partisipasyon sa tanang stakeholders, apil na ang mga barangay ug pribadong sektor.
Kini nga inclusivity magamit dili lamang sa mga ahensya nga nagpatuman sa balaod apan apil usab sa mga grupo sa pribadong sektor nga gilauman nga maghatag sa ilang suporta sa kalihokan.
Sapagkakaron, wala pa hinouy pinal nga plano apan giyag-yag niini nga adunay bag-ong mga pakulo ang ipahigayon. | via Bombo Nathaniel Sandoval
