Gihan-ay sa lokal nga panga-gamhanan sa dakbayan sa Sugbo ang skedyul alang sa mga mamalitay sa Carbon Public Market.
Matod ni Cebu City Mayor Edgardo Labella nga tumong niini nga ma-obserbar gyud ang “social distancing” nunot sa nagpadayong hulga sa coronavirus disease 2019.
Sa giluwatang Executive Order 069 sa Mayor, “alphabetical” na ang skedyul sa mga mopalit sa Carbon Public Market.
Adlaw’ng Lunes mao ang adlaw sa pagdis-infect sa mekado. Adlaw’ng Martes magsugod ang market days diin ang adunay apelyedo nga nagsugod sa letrang A-B-C-D mao ang makapamalit sa Carbon; Miyerkules ang adunay apelyedo nga nagsugod sa letrang E-F-G-H; Huwebes ang adunay apelyedo nga nagsugod sa I-J-K-L; Biyernes ang adunay apelyedo nga nagsugod sa letrang M-N-O-P; Sabado mao ang apelyedo nga nagsugod sa Q-R-S-T-U og adlaw’ng Domingo ang adunay apelyedo nga nagsugod sa V-W-X-Y-Z.
Magsugod usab sa pag-abli ang Carbon Market Complex sa alas saes sa buntag ngadto na sa alas singko sa hapon diin wala na’y tugotan nga makasulod nga sakyanan sa lugar.
Subay niini, gipasabot sa Mayor nga istrikto gyud nga monitoron ang mga mopalit sa Carbon. Hangyo sa Mayor ngadto sa publiko nga mosabot sa sitwasyon tungod sa epekto sa Coronavirus Disease 2019.
