Niinsister si Bukidnon Representative Jonathan Keith Flores nga kinahanglang madungog una ang tingog sa mayoriya sa House of Representative kon gusto nilang ibalik ang gamhanang komitiba nga House Quad Committee.
Bisan pa sa daghang mga kongresista nga mipabor sa pagbanhaw niini, matod ni Flores nga ang QuadComm gimugna sa 19th Congress ug automatic nga natapos sa pagsulod sa 20th Congress.
Si Flores maoy bag-ong chairman sa House Committee on Dangerous Drugs, ang komitiba nga gipangulohan kaniadto ni Surigao del Norte Rep. Robert Ace Barbers.
Gani si Barbers nagsilbi nga lead chair sa upat ka hiniusang komite.
Bisan og matod niya daghan og nahimo ang gamhanang komitiba, apan ang tingog sa kinabag-an sa mga magbabalaod kinahanglan una nga tagdon kon matukod pag-usab ang pagtinabangay sa upat ka House Committee.
Samtang, isip bag-ong House Dangerous Drugs Committee chair, si Rep Flores nagtuo nga lig-on ang kampanya sa kasamtangang administrasyon batok sa ilegal nga drugas.
Nangatarungan ang kongresista nga mahimong masubay ang mga dagkong supplier, sama niadtong bag-o lang na-intercept sa sunodsunod nga operasyon sa kapulisan.
Girekomenda usab sa magbabalaod nga ang kapulisan, gawas sa mga suppliers ug dagkong drug personalities, target usab sa mga street-level drug personalities nga giingong nalambigit sa pagpamaligya og drugas.
