Giimbestigaran sa Deparment of Education (DepED)-7 ang nahitabong pagpanunggab sa sulod sa Cabancalan National High School, sa dakbayan sa Mandaue niadtong nakalabay nga adlaw.
Kahinumdumang gidunggab sa 19-anyos nga out-of-school-youth ang usa ka grade 9 student sa sulod sa pansayan gumikan sa selos.
Base sa imbestigasyon sa kapulisan, mihulga ang lalaki nga suspek nga kung dili kini makigbalik sa iyang ex-girlfriend, adunay mahitabong dautan sa iyang bag-ong love interest.
Read more: HS dropout nga gituohang nanunggab sa Gr.9 student tungod sa selos, gipangita sa kapulisan
Matud ni DepED-7 Director Dr. Salustiano Jimenez nga nagpaabot sila sa incident report gikan sa Mandaue City Division.
Kini aron masuta kung aduna bay liability ang guard on duty sa maong insidente ilabi na nga daling nakasulod ang suspek sa tunghaan nga adunay dalang balisong.
Nasayran nga nakasulod sa ang 19-anyos nga lalaki sa tunghaan diin naka-uniform pa kini.
Nabantayan usab ni Jimenez nga dili tanang tunghaan sa Sugbo, adunay metal detector.
Kung moabot na sa regional office ang maong report, ila kining i-validate aron mahatagan og dinaliang aksyon.
Nanghinuat usab si Jimenez nga makig-alayon ang mga magtutudlo sa gipatumang hugot nga seguridad sa sulod sa tunghaan aron mamentenar ang kalinaw sa mga tinun-an.
