CEBU CITY- Mapadayon gayud ang pagtukod sa bag-ong headquarters sa Cebu City Police Office sulod sa Camp Sotero Cabahug, bisan pa man sa kapildihan sa piniliay ni Outgoing Cebu City Mayor Raymond Alvin Garcia, mao kini iyang giklaro kagahapong adlawa Mayo 22, 2025.
Gibutyag niya kini atol sa iyang pagbisita sa Camp Sotero Cabahug,kagahapon sa buntag alang sa usa ka tigom kabahin sa kampanya batok sa drugas sa mga barangay.
Nibuhi usab ug pasalig si Mayor-elect Nestor Archival nga iya rang ipadayon ang nasugdang mga proyekto ni Mayor Garcia, basta aduna lang kiniy saktong pundo.
Matud ni Mayor Garcia, sa higayon nga ma-bidding ug ma-award na ngadto sa kontraktor ang usa ka proyekto, nagpasabot kini nga aduna nay gahin nga pundo ug nakumpleto na ang mga gikinahanglan nga proseso, maong dili angay mabalaka ang CCPO.
Kahinumdoman nga gipangulohan ni Mayor Garcia niadtong Pebrero 26, 2025 ang groundbreaking ceremony sa tukorong bag-ong edepisyo sa CCPO.
Dugang niini nga kanunay siyang magtan-aw sa kalamboan sa pagtukod sa bag-ong edepisyo tungod kay ubos pa kini sa iyang pamunoan isip mayor sa dakbayan. | Bombo Nathaniel Sandoval
