CEBU CITY — Gikwestyon ni Cebu City Councilor Joel Garganera ang Memorandum of Agreement sa ‘fun ride’ o carnival sa South Road Properties kung diin P1-M lang abang sulod sa tulo ka buwan.
Matod ni Garganera nga sa milabay nga tuig, dako ang kita sa Cebu city diin P3.5-M ang nakuha gikan sa carnival ug wala pay labot ang amusement tax kung diin siya pa ang nagdumala niini.
Wala, matod pa, gipaagi sa bidding ang maong carnival hinungdan nga natingala ang konsehal bisan pa man og nakalatid sa balaud ang pag-bidding niini.
Dugang pa sa konsehal nga kung way mahitabo nga bidding, mahulog lang nga barato ang kita.
Kini gumikan kay gihatag man kini sa usa ka indibidwal nga maoy mutukod sa mga ‘fun ride’.
‘Dili na ipaubos sa public bidding’
Dili na kinahanglan ipaubos sa public bidding ang pagbutang ug carnival sa South Road Properties gumikan dili man kini usa ka matang sa procurement. Kini ang gibutyag ni Atty. Joey Daluz, ang SRP Project Manager.
Gibutyag ni Daluz nga usa ka ektarya lang ang gipaabangan karon hinungdan nga gamay lang ang abang itandi sa milabay nga tuig kung diin 9 hectare ang gigamit.
Matod sa manlalaban nga adunay mga stall sa pagkaon kaniadto nga apil sa paabang ug ang carnival lang ang gihatag gumikan ang mga vendors ang mo-okupar didto pinaagi sa City Market.
Gitataw usab sa SRP project manager nga kaniadto gitogotan ang gambling sa pag-operate apan gidid-an nila karon ug pulos mga fun rides ang nakabutang niini.
Usa sa mga katoyoan gumikan, matod pa, ang area dili pa patag ug ang nag-abang maoy bahala niini.
Gibutyag usab ni Daluz nga dili na kinhanglang mugasto ang city government sa pagpatag sa area kay aduna silay laing plano sama lang sa pagtukod sa football field sa maong gipaabangang luna. (Lahvi Quiñones)
