CEBU – Subay sa gipagawas nga Executive Order (EO No. 16) ni Cebu Provincial Governor Gwendolyn Garcia nga gitawag ug ‘Rationalizing the Wearing of Face Masks within Cebu’.
Diin dili na ‘required’ ang pagsul-ob og face mask sa mga open spaces ug outdoor settings sa probinsiya sa Sugbo apan nakalatid sa naasoy nga executive order nga ‘required’ sa gihapon ang pagsul-ob ug face mask sa mga ‘closed’ o air-conditioned spaces.
Gipasabot ni Dr. Rene Josef Bullecer, usa ka medical doctor, nga sa wala pa magpagawas og EO ang gobernadora gilantaw na niini ang sitwasyon sa ubang nasod diin ubos na kaayo ang kaso sa Covid-19, luag nga restriksyon ingon man dunay uban nga dili na kaayo hugot ang pagpatuman sa face mask.
Gitino ug ghimug-atan usab ni Bullecer nga walay scientific bases nga makapugong sa pagkuyanap o tinakdanay sa makamatay nga kagaw ang pagsul-ob sa face mask.
Sa habig usab ni Dr. Mary Jean Loreche , chief pathologist sa Department of Health (DOH7) , depende na usa ka tawo kung musunod sa kamandoan nga dili pagsul-ob sa face mask o ipabilin sa gihapon ang pagsul-ob niini sa paglikay sa COVID-19.
Matud ni Loreche nga ‘discretion’ na sa usa ka indibidwal nga mulantaw sa sitwasyon kung luwas ba kini kung ugaling dili magsul-ob ug face mask.
Hangyo na lang ni Loreche sa katawhan nga magpabakuna alang adtong wala pa gayud makapabakuna, ingon man nga magpaturok na usab ug booster shot gumikan kay mao kini ang labing importante sa pakigbatok sa COVID-19 diin hangtud karun anaa pa sa palibot.
