Gipahibalo ni Atty. Michael Poa, ang tigpamaba ug abogado sa depensa, nga wala pa gikumpirma ni Bise Presidente Sara Duterte kung motambong ba siya sa iyang impeachment trial sa sunod semana, diin gilauman nga ipresentar sa prosekusyon ang iyang manghod nga lalaki nga si Davao City Mayor Sebastian “Baste” Duterte isip saksi.
Una nang gikumpirma sa Senate impeachment court nga pasubpoena-han si Mayor Baste aron tubagon ang mga alegasyon bahin sa mga kontrata sa gobyerno nga nakuha sa mga kompanya sa iyang igsoon gikan sa lokal nga kagamhanan sa Davao.
Sumala ni Poa, wala pay gisulti ang Bise Presidente bahin niini ug gipasabot nga ang mga abogado dili kasagaran mo-rekomenda sa pagtambong sa respondent, apan ang katapusang desisyon anaa ra gihapon sa Bise Presidente.
Mensahe usab ni Poa nga adunay kaugalingong mga abogado si Mayor Baste ug magpaabot na lamang sila sa mahitabo sa sunod semana, samtang nagpasidaan ang prosecution nga mahimong nga arestohon ang mayor kon balibaran niini ang subpoena sa impeachment court.
Sa laing bahin, wala pa makadawat og pormal nga subpoena si VP Sara bisan pa nga nagpadayag ang prosecution sa ilang intensyon nga tawagon siya isip saksi human mapresenta ang tanang articles of impeachment.
Sukad sa pagsugod sa trial niadtong Hulyo, kausa pa lang nakatambong ang Bise Presidente sa Senado aron makigtagbo sa iyang defense team sa wala pa pormal nga nagsugod ang hearings.
Dugang ni Poa, nakadiskusyon na usab nila ang Bise Presidente bahin sa sub judice rule aron malikayan ang paglapas niini, ug kanunay kining magpakig-alayon sa iyang mga abogado sa maong mga legal nga hisgutanan.
