CEBU – Nagkanayon ang kontraktor nga nagdumala sa pagtukod sa Phase 4 sa Cebu City Medical Center (CCMC) nga posibleng dili na kini mahuman sa Oktubre 28, 2022, ang target nga petsa nga gihatag ni Cebu City Mayor Michael “Mike” Rama.
Kini human gibutyag sa M.E Sicat Construction, atol sa pakigtagbo nila ni Rama ug sa pipila ka health officials sa CCMC niadtong Miyerkules, Hulyo 27, 2022, nga nagkinahanglan sila og third party nga mohimo og engineering study sa structure tungod sa gidudahang adunay misalignment sa foundation sa building nga gihimo sa kanhing mga kontraktor niini na maoy rason nga dili matuman ang target date nga gihatag ni Rama.
Sumala sa M.E Sicat, ang pagtuon, nga ipahigayon sa usa ka third party , makatabang sa pagsiguro sa integridad sa 10-story building.
Hinuon, gisiguro sa kontraktor nga andam silang ipresentar ngadto sa City government ang metodolohiya sa pagtuon karong adlawa Huwebes, Hulyo 28.
Kahinumduman, nga gihatagan ni Rama og hangtod Oktubre 28, nga maoy iyang adlaw’ng natawhan, ang kontraktor aron mahuman ang pagtukod sa maong tambalanan.
