Gibanabana nga mawad-an og kapin P170 bilyones kada tuig nga kita ang gobyerno kon wagtangon ang value-added tax (VAT) sa mga produktong petrolyo, matod ni Energy Secretary Sharon Garin niadtong Biyernes, Abril 10, 2026.
Atol sa usa ka press conference, gipahayag ni Garin nga ang VAT sa mga produktong petrolyo naglangkob sa dakong bahin sa kita sa gobyerno, busa ang pagwagtang niini mahimong moresulta sa seryosong kakulang sa pondo sa estado.
Dugang niya nga gikinahanglan ang pag-usab sa kasamtangang balaod sa dili pa mapatuman ang bisan unsang pagwagtang sa VAT sa fuel products.
Sumala sa mga taho, ang pagsaka sa presyo sa lana naggikan sa unom ka semana nga panagbangi sa rehiyon, nga nagpalala sa krisis sa Strait of Hormuz—usa sa dako nga ruta sa suplay sa lana sa kalibutan—nga nakadugang sa global nga krisis sa enerhiya.
Tungod niini, padayon nga misaka ang presyo sa lana sa merkado sa kalibutan, nga nakaapekto sa Pilipinas nga nagsalig sa hapit 98% nga imported nga krudo gikan sa Middle East.
