CEBU CITY-Nanawagan si Rotche Tocmo, 31-anyos, sa kapulisan nga naghupot sa kaso sa iyahang manghud nga dili pasagdan nga mahilom na lang ang nahitabo sa iyahang igsuon.
Gihimug-atan niini nga gikinahanglan nila ang hustisya arun nga mahiluna usab ang iyahang manghud kinsang giingong kanunay nga magparamdam kaniya nga maghilak.
Nanghinaut kini nga tabangan sila sa kapulisan nga masulbad ang kaso ug makab-ot nila ang ti-unay nga hustisya.
Samtang, nanawagan usab kini sa nagbuhat sa krimen nga mo surindir ug bayran ang linu-og nga gibuhat niini sa iyahang manghud.
Si Rotche ang igsuon ni Rhea Mae Tocmo, 19-anyos, kinsang napalgan nang patay nga gisulod ug karton sa may Sitio Mohon, Barangay Tisa, dakbayan sa Sugbo, niadtong Lunes, Hunyo 17, 2023.
Kauban ni Rotche karun dinhi sa Sugbo ang ilahang amahan nga si Romeo Tocmo, arun nga i-claim ang patay nga lawas sa biktima nga anaa sa usa ka punerarya.
