UNITED STATES — “Expectation versus reality” ang drama sa usa ka pamilya sa Texas gumikan kay nakapalit sila og peke nga cake sa usa ka supermarket.
Hilabihan ang kalagot sa pamilyang Flores sa dihang ilang nasayran nga hinimo sa stryofoam ang napalit nga cake.
Matud ni Nellie Flores nga nag-order sila daan og cake alang sa usa ka graduation party. Pagkataud-taud lang, nasayran ni Nellie ug ang igsuon niini nga si Marsy nga nawala diay ang gi-order nga cake.
Aron masulbad ang maong problema, gihatag sa manager sa supermarket ang nakadisplay nga cake apan wala sila masayud nga styrofoam cake diay to.
Kung mahulagway, nakaporma ang styro og cake ug gibutangan lang kini og frosting.
Human nga nasayran sa management ang maong pagkasipyat, mihatag sila og gift card nga mibalor og $60 isip compensation ug free cake voucher.
Nagkanayon ang manager sa supermarket nga misangput sa maong kasaypanan sa giingong misunderstanding.
