CEBU CITY — Gikalipay sa National Task Force COVID-19 chief implementor nga si Sec. Carlito Galvez Jr. ang panaghiusa sa mga local government units sa Sugbo ug sa mga pribadong sektor aron pakigbatukan ang global pandemic.
Atol sa IATF Virtual Presser niadtong Mayo 23, nagkanayon si Galvez nga maayo ang nahimong koordinasyon tali sa gobyerno ug sa pribadong sektor alang sa pagpatuman sa mga lakang batok sa makamatay nga virus.
Tuyong mibisita si Galvez sa Sugbo aron subayon ang kahimtang sa Sugbo diin libuan na ang natakdan sa COVID-19, human nimando silang Presidente Rodrigo Duterte ug Senator Bong Go kaniya.
Una nang mipadayag ang IATF nga pakusgon ug palapdan pa ang coronavirus testing sa Sugbo ngadto sa 10,000 sulod sa duha ka buwan ug mabuhat kini pinaagi sa pagpalapad sa mga testing centers.
Samtang gikalipay usab ni Galvez ang pagpahigayon sa strategic rapid testing ubos sa “Project Balik Buhay” bisan pa man sa giingong mga nitumaw nga anomaliya kalabot niini.
Dugang pa ni Galvez nga ilang gipangandaman ang ikaduhang hugna sa mga COVID-19 cases, bisan pa man og naningkamot ang gobyerno nga makalampus sa maong pandemya.
Kini aron nga dili na matibugsok og samot ang ekonomiya sa nasud kun ugaling mahitabo man kini.
