CEBU – Nipalabang og resolusyon ang Sangguniang Bayan sa Munisipyo sa Panglao niadtong Agosto 22, 2022, nga nag-awhag kang Presidente Ferdinand “Bongbong” Marcos Jr. nga dili na itudlo pag-usab si Victor Caindec isip regional director sa Land Transportation Office (LTO)-7.
Gipirmahan ang maong resolusyon sa lima ka konsehal sa maong lungsod ug Vice Mayor Noel Hormachuelos.
Sa maong resolusyon, gipasanginlan si Caindec ug ang iyang field personnel nga nakahimo og grave abuse of discretion pinaagi sa pag-isyu og medical certificates sa daghang student permit applications bisan og wala mohimo og actual medical examination sa doktor kansang pirma makita sa dokumento ug dili accredited nga magpraktis sa nasangpit nga lungsod.
Nasayran nga adunay naglungtad nga ordinansa ang munisipyo nga nag-require sa mga medical doctor nga mokuha una og occupational ug business permit sa dili pa sila makapraktis sa ilang medical profession.
Gawas sa pagsupak sa pagtudlo pag-usab ni Caindec, giawhag usab sa resolusyon ang presidente nga dili na kini itudlo sa bisan unsang posisyon sa gobyerno.
