CEBU – Nabalaka ang school head sa Labogon National High School sa dakbayan sa Mandaue sa kakuwang sa ilahang classrooms.
Gibutyag ni Fernando Ylaya, nga midaghan karun ang ilahang enrollees kung diin sa pagkakarun aduna na sila’y 1,186 sa Junior High School, samtang 579 sa Senior High School, butang nga posibling magkuwang ang ilahang mga lawak-saringan.
Matud pa, kung ugaling mahitabo kining iyahang gikabalak-an, plano nila karun ang ‘shifting’ nga klase, diin adunay pang-buntag ug adunay pang-hapon arun lang gayud nga ma-‘accomodate’ ang tanang mga estudyante.
Gitino pa ni Ylaya nga ang maong ihap kay dili pa ang ‘final’ gumikan kay hangtud pa sa unang semana sa klase, sugod sa Agosto 22 kay magpadayon pa ang ilahang pagpanawat ug mga enrollees hinungdan nga posibli pa kining mudaghan.
Samtang, gipahibalo usab sa maong school head nga ugmang adlawa, Agosto 5, ang ilahang paglusad sa Brigada Eskwela sa ilahang eskwelahan.
Subay niini, iyahang giawhag ang tanang mga ginikanan ug uban pang mga stakeholders sama na lang sa mga private companies nga tambongan ug suportahan ang ilahang kalihokan.
