PROVINCE OF CEBU- Libre nang magamit sa publiko ang mga pansayan sa duha ka bus terminals sa Sugbo human nagkasabot ang Kagamhanang Lalawigan ug ang kontraktor nga Mister Loo sa ilang panagtabo niadtong Miyerkules, Hulyo 30, 2025.
Sugod ugma, Agosto 1 sa adlawng Biyernes kay dili na kinahanglan mubayad ang publiko sa paggamit sa mga comfort rooms sa Cebu North Bus Terminal (CNBT) ug Cebu South Bus Terminal (CSBT) sulod sa duha ka buwan.
Gipahibalo kini ni Cebu Provincial Governor Pamela “Pam” Baricuatro atol sa usa ka press briefing sa Kapitolyo nga nagkasabot sila sa kontraktor nga libre usa nga ipagamit ang mga pasilidad samtang adunay pipila ka renobasyon ang pagahimuon.
Kutob karong adlawa nalang ang pay-per-use system sa maong mga pansayan diin nagsugod ilang kontrata sa niadto pang nakalabayng administrasyon ni former Governor Gwendolyn Garcia.
Gani matod pa ni Gov. Baricuatro nga under review hangtod sa pagkakaron ang maong kontrata nga gilagdaan sa Kapitolyo ug sa kontraktor.
Kahinumduman nga gisaway sa bag-ong gobernadora nag maong kasabutan kay daw “lugi” ang Kapitolyo nga magdawatay ra og 5% bahin sa sales income gikan sa mga pansayan sa terminal.
