Giklaro sa kagamhanan sa dakbayan sa Pasay nga wala silay gipagawas nga business permit sa giatake nga Philippine Offshore Gaming Operator (POGO) hubs.
Sa usa ka pamahayag, si Pasay City Mayor Imelda Calixto-Rubio niingon nga ang bag-o lang giatake nga POGO nga mga pasilidad gilihok sa tago ug sa mga tago nga lugar ug wala gilihok ubos sa bisan unsang business license nga giisyu sa siyudad sa Pasay.
Giklaro usab sa mayor nga ang tanang business permit nga gi-isyu sa lokal nga kagamhanan ngadto sa kapin sa 13,000 ka mga establisemento karong tuiga gipaubos sa hingpit nga pagsusi.
Matod niya 100% misuporta ang siyudad sa panawagan ni Presidente Ferdinand Marcos Jr. aron mapapas ang mga ilegal nga operasyon sa POGO sa nasud ug dili sila motugot sa mga ilegal nga kalihokan sa ilang hurisdiksyon.
Ang lokal nga opisyal nihimo sa pagklaro nunot sa giingong iresponsableng pamahayag ni Presidential Anti-Organized Crime Commission (PAOCC) spokesperson Winston Casio kalabot sa ilegal nga operasyon sa POGO sa Pasay City nga dili makiangayon nga nakadaot sa dungog sa mga opisyal sa dakbayan.
Hinuon giinsister sa mayor nga hugot na nga gipatuman sa LGU sa Pasay ang pagpahunong sa operasyon sa POGO sa ilang hurisdiksyon.
Naglakip kini sa gipakusog nga pagmonitor, estrikto nga pagpatuman sa regulasyon, ug padayon nga kooperasyon sa nasudnong mga ahensya nga nagpatuman sa balaod.
Gipasidan-an usab niini nga si bisan kinsa nga makit-an nga makalapas sa balaod adunay tulubagon.
Sa katapusan, si Mayor Rubiano nibarog sa iyang zero-tolerance policy sa POGO operations ug niingon nga dili tugotan ang mga POGO sa iyang siyudad.
