CEBU CITY-Wala na matud pa’y mahimo kung ikasuko pa ni Cebu City Vice Mayor Michael ‘Mike’ Rama ang nahitabo nga religious activity sa Sitio Alumnos, Barangay Basak San Nicolas, dakbayan sa Sugbo, niadtong nakalabay nga Sabado sa gabii, Hunyo 27.
Matud ni Rama nga ang importante mao nga dili na subling buhaton sa mga residente ang maong kalapasan gumikan kay giingong usa kini ka dakong kaulawan sa ilahang dapit.
Nasayran nga ang Barangay Basak San Nicolas mao ang ‘balwarte’ ni Vice Mayor Rama, kung diin matud pa, mao gayud kini ang lugar nga iyahang gidak-an. Sigon pa sa bise mayor nga gikinahanglan nga mabutang sa hunahuna sa mga Basakanon nga kanunay ang pagpabilin sa panimalay, ingon man nga musunod sa kamandoan sa gobyerno arun nga dili pa musangpot nga padalhan ug pulis ug pangdakpon.
Mensahe pa sa opisyal nga, “pasaylo-a sila kay wala sila masayod sa ilahang gibuhat”.
Samtang, nanawagan usab si Rama sa mga adunay ikasarang sa pagtabang sa mga lumulupyo sa Barangay Basak San Nicolas, ilabi na sa mga nag-unang kinahanglanon, ingon man face masks, arun nga matud pa, wala na kini sila’y rason nga dili maka-comply sa kamandoan sa gobyerno. | via SBR
