CEBU CITY- Gilunsad karong adlawa ang Oplan Kontra Baha Metro Cebu, diin dungan nga limpiyohan ang pito ka nag-unang suba sa Metro Cebu, lakip ang ang Butuanon River (Mandaue City), Subangdaku River (Mandaue City),Kinalumsan River at Mambaling Flyover (Cebu City), Guadalupe River (Cebu City), Mananga River (Talisay City), Cansaga Bridge (Consolacion) ug Cot-cot River(Liloan).
Ang maong kalihokan gipangulohan ni Presidente Ferdinand “Bongbong” Marcos Jr., kauban ang mga miyembro sa iyang gabinete, Cebu Provincial Governor Pamela Baricuatro, ang mga mayor sa Metro Cebu, ug mga representante sa DPWH.
Tumong sa inisyatibo ang paglimpyo sa mga kasapaan aron maminusan ang peligro ug epekto sa pagbaha—sama sa nahitabo panahon sa Bagyong Tino, nga mitala og 95 ka namatay sa Probinsya sa Sugbo.
Ang programa, nga unang gipaila ni Presidente Ferdinand R. Marcos Jr. sa Parañaque City niadtong Nobyembre 12, 2025, nagpunting sa regular nga paghawan sa mga debris ug basura gikan sa mga agianan sa tubig ug mga sistema sa drainage, ingon man pagsiguro sa episyente nga operasyon sa mga pumping station aron maminusan ang pagbaha sa mga ubos nga lugar.
Gawas sa Cebu ug Metro Manila, ang Oplan Kontra Baha ipatuman usab sa Bacolod, Roxas City, Bulacan, Pampanga, Cavite, Laguna, Pangasinan, Cotabato, Davao, Cagayan de Oro, ug uban pang mga lugar nga daling mabahaan sa tibuok nasud.
Ang multi-sectoral nga inisyatibo nagtumong sa paghawan sa mga agianan sa tubig, mga sistema sa drainage, mga suba, mga estero, ug uban pang imprastraktura nga daling mabahaan—ilabi na sa mga sentro sa kasyudaran, aron maminusan ang kasubsob ug kagrabe sa pagbaha.
