-- ADVERTISEMENT --

Gihimug-atan ni Presidente Ferdinand Marcos Jr. nga ang kalig-on sa Association of Southeast Asian Nations (ASEAN) nga wala lang magbase sa mga kasabutan ug dokumento, kondili sa lawom nga relasyon, pagsalig, ug sa Filipino value nga “kapwa”—ang pagtan-aw sa atong kaugalingon diha sa uban ug ang pag-ila sa atong managsamang pagkatawo.

Atol sa iyang pakigpulong uban sa mga delegado ug lider sa rehiyon, gipasabot sa Presidente nga bisan og managlahi ang kasaysayan ug interes sa matag nasud sa ASEAN, nagkat-on ang rehiyon sulod sa dul-an unom ka dekada nga ang kalinaw ug kauswagan sa silingang nasud nagpalig-on usab sa kaugalingong nasud.

Gihinumdoman usab ni Marcos ang kasaysayan niadtong 1976 sa Bali, diin ang iyang amahan, nga si kanhi Presidente Ferdinand Marcos Sr., nakighiusa sa upat ka laing mga lider alang sa unang ASEAN Summit ug pagpirma sa Treaty of Amity and Cooperation in Southeast Asia. Matod niya, ang maong mga pundasyon sa kanunay nga konsultasyon ug kooperasyon mao ang naghimo sa ASEAN nga lig-on karon, butang nga iyang gihuptan karon isip Chair.

“Governments change, leaders change, the circumstances before us, they change. But the relationships that sustain ASEAN are carried from one generation onto the next,” matod pa ni Presidente Marcos, dungan sa pagpahinumdom nga ang ASEAN gisalig lang sa kasamtangang henerasyon aron mas palig-onon pa sa dili pa ipasa sa sunod.

Ingon man nga gidayeg sa Presidente ang mga dialogue partners sa ASEAN nga padayong nagbubo og suporta alang sa kalinaw ug kalig-on sa rehiyon. Sa pagtapos sa iyang mensahe, gidasig niya ang tanang mga bisita nga tagamtamon ang pagkamaabi-abihon sa mga Pilipino sa dili pa ang taas nga adlaw sa mga tigom ugma.

-- ADVERTISEMENT --