Giawhag ni Presidente Ferdinand Marcos Jr. ang mga Pilipino nga mokuha og inspirasyon gikan sa kinabuhi ug mga sakripisyo sa ilang mga mitaliwan na nga minahal pinaagi sa paghatag og tabang ug pagpakita og kalooy ngadto sa uban karong Adlaw sa mga Santos ug Adlaw sa mga Kalag.
Matod ni Presidente Marcos, ang pagbisita sa mga sementeryo usa ka higayon aron mahinumdoman ang mga minahal, mag-ampo alang kanila, ug maghiusa ang mga pamilya.
Dugang pa niya nga bisan pa man og wala na uban kanato ang mga mitaliwan na, ang ilang gugma ug ang mga handumanan nga ilang gibilin nagpabilin gihapon.
“I join the Catholic faithful and the entire Filipino nation in the solemn observance of All Saints’ Day and All Souls’ Day. Across the country, families return to cemeteries, offering prayers and celebrating the lives and legacies of departed loved ones. Some travel great distances for these visits, finding an opportunity to reunite with relatives and recall the moments they once shared,” matod ni Presidente Ferdinand Marcos.
Giawhag usab sa Presidente ang publiko nga sundogon ang kaayo ug espiritu sa pagserbisyo ngadto sa uban—mga hiyas nga gipakita sa mga santos ug niadtong naghimo og mga sakripisyo alang sa ilang mga komunidad.
Gipasiugda sa Presidente nga ang gugma ug pagpakabana dili angay nga alang lamang sa mga mitaliwan na, kondili angay usab nga ihatag ngadto sa mga nanginahanglan.
Matod niya, ang panan-awon sa usa ka “Bagong Pilipinas” mahimong mas makahuluganon kung ang matag usa mogakos sa kaayo ug kalooy alang sa uban.
Dugang pa ni Presidente Marcos, “May these solemn days bring peace to those who mourn and remind us to cherish those who remain.”
