Nag-deploy ang Department of Public Services (DPS) og mokabat sa 150 ka personnel sa nagkalain-laing sementeryo sa dakbayan sa Sugbo aron sa pagmintinar sa kalimpyo ug kahapsay atol sa pagsaulog sa All Souls’ Day karong Nobyembre 2.
Matud ni John Paul Gelasque ang Head sa DPS, gibahinbahin ang mga garbage collector ug cleaners sa nagkalain-laing sementeryo, diin tagsa-tagsa silang gi-assign sa ilang designated areas aron masiguro nga limpyo ang palibot, lakip na ang mga dalan nga nagpalibot sa mga sementeryo.
Gibutyag usab sa DPS nga kasagarang basura nga makuha sulod sa mga sementeryo mao ang mga plastik ug mga botelya sa tubig, bisan pa sa padayong information dissemination kabahin sa hustong paglabay sa basura.
Samtang, wala pa’y naitalang pag-isyu og citation ticket batok sa mga nakalapas sa mga ordinansa atol sa ilang monitoring.
Gipahinumdoman hinuon sa DPS ang publiko nga ang paglabay og basura bisan asa ug ang pagpanigarilyo maoy mga paglapas nga mahimong silotan og citation ticket.
Gilauman nga magpadayon ang deployment sa DPS personnel hangtod ugma, Nobyembre 3, aron masiguro nga mabilin nga limpyo ang mga sementeryo human sa Undas.
Giawhag usab sa DPS ang publiko nga gamiton ang mga garbage bins nga gibutang sa mga strategic location sulod sa mga sementeryo ug, kon mahimo, dad-on ang ilang basura pauli aron makatabang sa pagmintinar sa kalimpyo sa palibot.
