Nipagawas og kamanduan si Presidente Ferdinand “Bongbong” Marcos Jr. nga suspensuhon ang importasyon sa bugas sulod sa 60 ka adlaw sugod sa Septiyembre 1.
Ang kamandoan ni Marcos Jr. nagpormal sa iyang desisyon nga gihimo sayo karong Agosto subay sa rekomendasyon sa Department of Agriculture (DA).
Ang Executive Order 93 nga gipirmahan niadtong Agosto 29 apan gipahibalo lamang niadtong Sabado, Agosto 30 nga nagsuspenso sa importasyon sa regular-milled ug well-milled nga bugas sulod sa 60 ka adlaw.
Ang kamandoan nagkutlo sa DA nga nag-ingon nga adunay panginahanglan sa pagsuspenso sa importasyon sa bugas peak harvest season aron makahimo ang domestic nga merkado sa pagbaligya sa lokal nga suplay, pagpalig-on sa mga presyo, ug pagtabang sa mga Pilipinong mag-uuma sa pagbaligya sa ilang humay sa patas ug makatarunganon nga presyo.
Ang pagsuspenso sa importasyon sa bugas molungtad hangtod Oktubre 30, 2025.
Ang panahon sa pagsuspenso kay mahimong mub-an o mapalugway, kung gikinahanglan, sa hiniusang rekomendasyon sa DA, Department of Economy, Planning, and Development (DEPDev), ug Department of Trade and Industry (DTI).
Ang tulo ka ahensya gimanduan nga magtigom sulod sa 30 ka adlaw human epektibo ang kamanduan aron sa pagtimbang-timbang sa epekto sa pagsuspenso sa importasyon sa suplay ug presyo sa bugas sa nasud.
Gimandoan usab sila nga isumite sa ulahi sulod sa 15 ka adlaw ang hiniusang rekomendasyon sa Presidente pinaagi ni Executive Secretary Lucas Bersamin.
Unang gihimo ni Marcos Jr. ang suspension pronouncement niadtong Agosto 6 human sa konsultasyon sa mga sakop sa Gabinete sa sidelines sa iyang 5 ka adlaw nga state visit sa India ug sa rekomendasyon ni Agriculture Sec. Francisco Tiu-Laurel Jr.
