Mokanaog gikan sa kaulohan si Presidente Ferdinand Marcos Jr. sa Bogo City, Cebu karong adlawa, Oktubre 2, aron personal nga susihon ang kahimtang ug kadaot sa niigo nga 6.9 magnitude nga linog.
Kini ang gikumpirmar ni Department of Public Works and Highways Secretary Vince Dizon kinsang usa usab sa mga niabot sa Sugbo.
Sa kamandoan ni Presidente Marcos daghang mga miyembro sa gabinete ang milahos sa Command Center sa Bogo City aron personal nga bantayan ang pagtubag sa kadaot nga gipahinabo sa kusog nga katalagman.
Gawas kang Secretary Dizon, anaa usab ang presensya nila ni Sec. Gilberto Teodoro, Social Welfare Sec. Rex Gatchalian, Public Works Sec. Vince Dizon, ug Tourism Secretary Christina Frasco.
Una nang nipasalig ang Palasyo nga mokonaog sa Sugbo ang mga kawani sa mga buhatan sa gobyerno aron motabang sa sitwasyon ug panginahanglan sa mga biktima.
Sa pikas bahin, basi sa inisyal assessment nga gibuhat ni Sec. Vince Dizon nga dul-an sa P2 bilyones ang kadaot sa imprastraktura ug posibleng modako pa kini.
