Gipahibalo sa Malacañang nga si President Ferdinand R. Marcos Jr. nagpadayong naka-focus sa pagsulbad sa nag-unang mga isyu sa nasud, ug iyang gisalikway ang “kasaba” sa mga panawagan sa iyang pag-resign.
Gipunting ni Palace Press Officer Claire Castro nga adunay mga “propagandista ug mga destabilizer” nga misulay sa paglihis sa isyu sa pagkontrol sa baha pinaagi sa pagdugtong niini ngadto sa mga personalidad nga nalambigit sa iskandalo sa korapsyon.
Matod ni Castro, ang mga nalambigit sa maong anomaliya maoy posibleng makabenepisyo kung ang Presidente mokanaog sa pwesto, tungod kay mahimong maputol ang gipadayon nga imbestigasyon ug mga reporma batok sa korapsyon.
Una niini, ang pipila ka mga grupo, lakip na ang mga tigpaluyo sa pamilya Duterte, nanawagan sa pagpalagpot sa Chief Executive atol sa usa ka rally sa Liwasang Bonifacio niadtong Domingo.
Sa iyang pamahayag, klaro ni Castro nga “ang pag-resign dili usa ka kapilian” alang sa administrasyong Marcos.
