Gikataho nga ang panagtagbo ni Presidente Ferdinand Marcos Jr. uban sa Presidente sa US nga si Donald Trump maoy labing una sa usa ka lider sa Association of Southeast Asian Nations (ASEAN) sukad nga milingkod pag-usab ang lider sa US.
Gitumong sa pagbisita ni Presidente Marcos sa Estados Unidos ang pagpalig-on pa sa relasyon tali sa Pilipinas ug U.S., ug sa pagpahimulos sa mga kahigayonan alang sa mas dakong seguridad ug kooperasyon sa ekonomiya.
Sa iyang departure statement, gipasiugda ni Marcos nga ang iyang nag-unang prayoridad atol sa pagbisita naglakip sa pagpausbaw sa kooperasyon sa pamatigayon ug ekonomiya, ilabi na sa bag-o lang gipahamtang nga 20 porsyento nga taripa sa US sa mga eksport sa Pilipinas.
Ang Hepe Ehekutibo nagtinguha nga ipaabot ngadto kang Trump nga ang nasud andam nga makigsabot sa usa ka bilateral trade deal nga magsiguro sa lig-on, mutually beneficial ug future-oriented nga kolaborasyon nga ang Estados Unidos ug Pilipinas lamang ang makapahimulos niini.
Gipaambit usab ni Marcos, nga nag-unang kaalyado sa Pilipinas ang United States atol sa bilateral meeting kang US President Donald Trump.
