Gipaambit sa Philippine Coast Guard Central Visayas (PCG-7) ngadto sa Kagamhanang Lalawigan sa Sugbo nga mas palapdan pa niini ang ilang coastal coverage sa kabaybayonan ug kadagatan sa probinsya.
Kini ang gipadayag ni PCG-7 Commander Rear Admiral Agapito Bibat atol sa courtesy visit niini kang Cebu Governor Pamela “Pam” Baricuatro niadtong Miyerkules, Disyembre 17 sa plano sa ahensya sa pagbutang og stationing personnel matag kabaybayonan sa lungsod ug dakbayan sa lalawigan.
Gihisgutan niini ang pag-activate og dugang Coast Guard substations sa matag coastal municipalities lakip na ang mga islang barangay sa Carnaza sa Daanbantayan ug Kinatarcan sa Santa Fe aron masiguro ang paspas nga pagresponde sa panahon sa katalagman.
Gihangop ni Governor Baricuatro ang maong inisyatiba sa PCG-7 ingon man sa iyang pagpasalamat kang Rear Admiral Bibat sa pag-abag sa probinsya sa mga nakalabayng katalagman nga miigo.
Gipasabot sa opisyal sa PCG-7 nga ang probinsya sa Sugbo kay kasamtangang nabahin sa upat sa istasyon nga mao ang Camotes Islands, Northern Cebu (lakip na ang Carnaza ug Kinatarcan), Central Cebu, ug Southern Cebu.
Gani sa Northen Cebu aduna kiniy 14 ka substations sa mga coastal municipalities dugang pa ang giplano sa Sogod, Borbon, Carnaza, ug Kinatarcan sa ihap nga muabot sa 18.
Samtang sa Central Cebu Station kay gilangkoban sa dakbayan sa Danao hangtod sa dakbayan sa Carcar nga adunay 15 ka substations. Ingon man ang isla sa Camotes sa upat niini ka substations ug Southern Cebu sa 11 nga mapun-an pa sa umaabot activation sa Alcoy, Ginatilan, Samboan, Barili, ug Alcantara.
