Gibisita sa Philippine Coast Guard (PCG) Central Cebu Station ang mga nag-unang pantalan sa dakbayan sa Sugbo subay sa preparasyon alang sa gipanglantawan nga pg dagsa sa mga manguliay karong Semana Santa.
Gipangunayan ni PCG Central Cebu Station Commander Captain Jerome Lozada ang pagbisita diin ilang gisusi ang kahimtang sa mga pasahero sunod sa terminal sa pier 1 ug pier 3 diin giisip kini nga Class A terminals sa Central Visayas.
Aduna gipanglatag nga mga help desk ug first aid stations alang sa mga pasahero nga nagkinahanglan og tabang.
Nakaplastada sab sulod sa mga terminal ang hugot nga mga inspeksyon sama sa additional security personnel gikan sa PNP Maritime Police, Cebu Ports Authority, ug sa PCG, lakip sab ang mga K9-units nga mitabang sab sa pagsiguro nga walay mga ginadili nga mga butang ang madala sa barko nga mobiyahe padung sa mga nagkalain-lain lugar sa Visayas ug Mindanao.
Matud pa ni Capt. Lozada nga ilang nabantayan nga anaa sa dul-an 2,000 hangtod sa 3,000 ka mga pasahero ang gipanglantawan nga modagsa sa pantalan sa Sugbo karong panahona diin kasagaran niini mga transit passengers nga moagi sa pantalan sa sugbo para mosakay padulong sa laing mga lugar.
Nagpahimangno sab si Capt. Lozada sa mga pasahero nga mas maayo mangandam ug planohan ang biyahe ug pag-book daan og mga tickets aron dili maproblema sa ilang mga biyahe karong Semana Santa.| with reports by Bombo Rexmond Omega
