Hingpit na nga nangandam ang Philippine Coast Guard Cebu sa mga pantalan nunot sa mga posibleng pagdagsa sa mga manguliay nga pasahero sa sing-abot nga kalag-kalag.
Subay niini, gikatakdang magpahigayon og inspeksyon sa mga nag-unang pantalan sa Cebu Port aron masuta ang sitwasyon sa pantalan sa Sugbo kabahin na sa mga safety and security measures.
Lakip usab niini ang mga luna nga butangan sa ilahang matag istasyon diin adunay ipakatap sa mga PCG Officers nga magbantay sa mga pantalan, ug usab pahimutangan og mga medical teams.
Gawas niana, adunay ipakatap usabg nga passenger assistance desk, kung diin mao ang dapit nga duolan sa mga pasahero kung adunay mga kinahanglan ingun man emerhensya.
Dugang niini, ikstrikto ang ilahang regulasyon nga ipatuman kabahin na sa mga gidiling butang nga makasulod sa barko, susama sa mga hinagiban o mahait o bisan paman ang mga explosives nga butang busa, lakip sa ipakatap mao ang K-9 units aron mo-abag usab sa pagsuta sa matag pasahero.
Nunot niini, ekslusibong nahinabi sa Bombo Radyo Cebu team si Jerome Lozada ang Station Commander sa Philippine Coast Guard Cebu ug iyahang gikabutyag nga sa sunod semana, ilaha na kining pagabuhaton ang naasoy nga mga preparasyon para sa umaabot nga kalag-kalag.
