Hugot nga gibantayan sa Philippine Coast Guard (PCG) ang kalihokan sa Chinese Coast Guard Vessel 5901 o mas nailhan nga “monster ship” human kini nasigpatan duol sa Capones Island sa Zambales niadtong Sabado.
Matod sa tigpamaba sa PCG sa West Philippine Sea, Commodore Jay Tarriela, human nila makompirmar ang presensya sa monster chip ila dayong gipakatap ang BRP Cabra (MRRV-4409) uban ang duha ka helicopter sa Capones Island area.
Nakit-an ang presensya sa “monster ship” pinaagi sa Dark Vessel Detection system gikan sa Canada.
Gipahibalo usab niini nga ang BRP Cabra ug ang PCG aircraft kay padayong naghatag og “challenge” sa CCG-5901 diin gipasiugda niini nga anaa sila sa exclusive economic zone sa Pilipinas basi sa Philippine Maritime Zones Law ug UNCLOS.
Gihatagan og gibug-aton ni Tarriela nga nagpabilin ang ilang pasalig sa hugot nga pag-monitor sa barko sa Chinese Coast Guard aron masiguro nga makapangita gihapon og panginabuhi ang mga mangingisda nga Pilipino nga dili na ma-harass sa mga barko sa China.
