Nanawagan ang Palasyo alang sa mas maampingon ug responsable nga pagtaho sa mga pagpamusil sa eskwelahan, hilabi na kung mga menor de edad ang nalambigit.
Sumala ni Palace Press Officer Usec. Claire Castro, nga kinahanglan nga likayan ang paghatag og mga detalye nga mosangpot sa pagpangopya o copycat acts.
Gihatagan usab og gibug-aton ni Castro nga importante ang pagtudlo sa mga batan-on sa hustong pamatasan, pagtahod sa uban, ug maayong pakiglabot sa mga classmate ug mga magtutudlo.
Kini nagsunod sa managlahing insidente sa pagpamusil sa usa ka eskwelahan sa Tacloban ug sa Ateneo de Zamboanga. Busa, gihangyo sa Palasyo ang media nga panalipdan ang dignidad, kaluwasan, ug pribasiya sa mga menor de edad, ingon man ang kaayohan sa mga namatyan nga pamilya ug ang nagpadayon nga imbestigasyon sa mga insidente.
Gipahugtan usab sa Department of Education (DepEd) ang seguridad sa mga eskwelahan human sa insidente sa Tacloban ug laing insidente sa Zamboanga.
