Gipanghimakak ni Philippine Charity Sweepstakes Office (PCSO) General Manager Mel Robles ang mga taho nga gi-hack ang personal nga detalye sa mga nakadaog sa lotto gikan sa ilang sistema.
Sa usa ka pahayag, gitawag kini sa opisyal nga fake news.
Matod niya walay sensitibo nga impormasyon gikan sa ilang mga website o database nga nakompromiso o na-hack.
Gipahimangnoan usab niya ang publiko nga magbinantayon sa fake news aron lang makakuha og views sa content.
Matod niini nga bisan og daghan nang mga pagsuway kaniadto sa pag-hack sa ilang sistema, nagpabiling lig-on ug dili masayon-sayon ang ilang digital defenses.
Gipanghimakak usab ni Robles ang online news report nga nagkanayon nga ang PCSO ug DICT nag-imbestigar sa giingong data breach sa mga mananaog sa lotto.
Matud pa ni Robles nga ang maong balita gikan sa giingong grupo sa mga hacker nga naningkamot nga makahimo og ngalan pinaagi sa paglapas sa PCSO system.
Hinuon, ang PCSO General manager niinsister nga walay bisan usa sa ilang mga account ang nakompromiso.
Sa usa ka post nga nag-viral gikan sa FB page nga Philippine Exodus Security, giingong gikompromiso sa mga hacker ang personal nga impormasyon sa mga nakadaog sa lotto lakip na ang ilang mga ngalan, address, numero sa telepono, ID ug winning number.
Apan saysay ni Robles nga posibleng nakuha sa mga hacker mao ang email accounts sa mga empleyado sa PCSO gikan sa ilang branch sa Cagayan diin kini ang mga listahan sa mga indibidwal nga naka-avail sa promo sa nasangpit nga branch niadtong Marso 2022 ug dili ang mga ngalan sa mga nakadaog sa lotto.
Giinsister usab ni Robles nga luwas ang ilang database sa mga nakadaog sa lotto jackpot sa ilang head office ug mga branches nationwide.
