CEBU – Gidayeg sa PDEA 7 ang paningkamot sa BJMP nga malimpyohan ang mga prisohan sa iligal nga drogas.
Gibutyag ni Leah Albiar-Alcantara, ang tigpamaba sa PDEA 7, nga ilahang nakita ang pagpaningkamot sa BJMP nga matubag ang mga nagkadaiyang isyu sulod sa ilahang mga pasilidad.
Bisan pa man nga giangkon sa kadagkuan sa BJMP nga lisod gayud ang pag-address sa mga problema sulod sa pasilidad, matud pa, nagpahigayon ug mga lakang ang maong ahensya ug usa na niini ang pagbutang ug mga signal jammer sa sulod arun nga dili basta makakuha ug komunikasyon ang mga piniriso sa gawas.
Gitino ni Alcantara nga ‘common perception’ sa mga tawo nga anaa sa sulod sa prisohan ang shabu, apan ang tinuod dili ang shabu mismo, inay ang contact sa supplier sa gawas ang anaa sulod sa pasilidad.
Kini ang pamahayag sa naasoy nga tigpamaba subay sa gipahigayon nga greyhound operation sa Cebu City Jail Male Dormitory kagahapong adlawa kung diin adunay nasakmit nga mga kontrabando, apan wala may iligal nga drogas ang nakuha.
